BAKI, AzerVoice, Nailə Babazadə
Almaniyanın silah və hərbi material ixracının həcmi 2025-ci ildə Ukraynaya göstərilən hərbi yardımın azalması fonunda təxminən 8,40 milyard avroya enib.
AzerVoice xəbər verir ki, Alman Xəbər Agentliyinin (DPA) məlumatına görə, Sol Partiyanın sorğusuna cavab verən Almaniya İqtisadiyyat Nazirliyi hökumətin bu ilin 8 dekabr tarixinədək 8,40 milyard avro dəyərində silah və hərbi material satışına icazə verdiyini açıqlayıb.
Məlumata əsasən, Almaniyanın silah ixracı 2023-cü ildə 12,15 milyard avro, 2024-cü ildə isə 13,33 milyard avro ilə rekord səviyyəyə çatmışdı. 2025-ci ildə isə bu göstəricidə nəzərəçarpacaq azalma qeydə alınıb.
Nazirliyin cavabında Rusiyaya qarşı müharibə aparan Ukraynaya edilən silah ixracındakı kəskin azalma xüsusi vurğulanıb. Berlin administrasiyası bu il Kiyevə 1,14 milyard avro dəyərində silah və hərbi texnika satışına icazə verib. Müqayisə üçün qeyd edək ki, 2024-cü ildə Almaniyanın Ukraynaya silah ixracı 8,15 milyard avro təşkil edib.
Xristian Birlik (CDU/CSU) və Sosial Demokrat Partiyanın (SPD) yaratdığı və 2025-ci ilin may ayında fəaliyyətə başlayan yeni Alman hökuməti bu il ərzində ümumilikdə 5,39 milyard avro dəyərində silah və hərbi material satışına razılıq verib.
Məlumata görə, Almaniya bu il ən çox silah və hərbi material ixracını 1,31 milyard avro ilə Norveçə həyata keçirib.
