BAKI, AzerVoice, Nailə Babazadə
Birləşmiş Millətlər Təşkilatının baş katibi Antonio Quterreş cümə günü İsraili Qəzzada humanitar yardım göstərən qurumlara tətbiq olunan qadağanı dayandırmağa çağırıb. Quterreş bu qərarla bağlı “dərin narahatlıq” keçirdiyini bildirib.
AzerVoice xəbər verir ki, BMT baş katibinin sözçüsü Stefan Düjarrikin yaydığı bəyanata görə, Quterreş bu tədbirin geri götürülməsini tələb edərək vurğulayıb ki, beynəlxalq qeyri-hökumət təşkilatları həyati əhəmiyyət daşıyan humanitar fəaliyyət üçün vazkeçilməzdir və onların fəaliyyətinin dayandırılması atəşkəs dövründə əldə olunan kövrək irəliləyişi risk altına qoya bilər.
Düjarrik bildirib ki, bu son addım fələstinlilərin üzləşdiyi humanitar böhranı daha da dərinləşdirəcək.
İsrail cümə axşamı Qəzza zolağına girişə icazə verilən 37 xarici humanitar təşkilatın fəaliyyətini dayandırıb. Qərara səbəb kimi həmin təşkilatların fələstinli əməkdaşlarının siyahısını İsrail rəsmiləri ilə paylaşmaqdan imtina etməsi göstərilib.
Qadağa Qəzzada əsasən fəaliyyət göstərən və Fələstin ərazilərində 1 200 əməkdaşı olan “Sərhədsiz Həkimlər” (MSF) təşkilatını da əhatə edir. Siyahıya daxil edilən QHT-lərə martın 1-dək fəaliyyətlərini dayandırmaq göstərişi verilib.
Bir sıra qeyri-hökumət təşkilatları bu tələblərin beynəlxalq humanitar hüquqa zidd olduğunu və onların müstəqilliyini təhlükə altına saldığını açıqlayıb. İsrail isə yeni qaydaların terroru dəstəklədiyini iddia etdiyi qurumların Fələstin ərazilərində fəaliyyətinin qarşısını almağı hədəflədiyini bildirib.
Cümə axşamı İsraildə fəaliyyət göstərən 18 sol yönlü QHT beynəlxalq tərəfdaşlarına qoyulan qadağanı pisləyərək, yeni qeydiyyat mexanizminin humanitar fəaliyyətin müstəqillik və neytrallıq prinsiplərini pozduğunu bəyan edib.
Qeyd edək ki, İsrailin 7 oktyabr 2023-cü ildə HƏMAS-ın hücumuna cavab olaraq başladığı müharibədən sonra oktyabr ayından etibarən kövrək atəşkəs rejimi qüvvədədir. Qəzza rəsmilərinin noyabr ayında açıqladığı məlumata görə, müharibə başlayandan bəri bölgədə 70 mindən çox insan həyatını itirib.
BMT məlumatlarına əsasən, müharibə nəticəsində Qəzzadakı binaların təxminən 80 faizi dağıdılıb və ya zərər görüb, infrastruktur demək olar ki, tamamilə məhv edilib. Qəzzada fəaliyyət göstərən Fələstin QHT Şəbəkəsinin direktoru Əmcəd əl-Şavanın sözlərinə görə, bölgə əhalisinin təxminən 1,5 milyonu evsiz qalıb.
