BAKI, AzerVoice, Nailə Babazadə
İranın yüksək rütbəli rəsmisi və Rusiya Xarici İşlər Nazirliyi ABŞ Prezidenti Donald Trampın İrandakı etirazlara müdaxilə ilə bağlı son təhdidlərinə sərt cavab veriblər.
AzerVoice xəbər verir ki, İran Milli Təhlükəsizlik Ali Şurasının katibi Əli Laricani mülki vətəndaşların ölümünə görə birbaşa ABŞ və İsrailin məsuliyyət daşıdığını bəyan edib. Donald Trampın sosial mediada iranlıları dövlət müəssisələrini ələ keçirməyə çağıran paylaşımından qısa müddət sonra Laricani "X" platformasında "İran xalqının əsl qatillərinin adlarını açıqlayırıq: 1-Tramp, 2-Netanyahu" deyə yazıb.
Rusiya Xarici İşlər Nazirliyi də məsələ ilə bağlı bəyanat yayaraq Trampın hədələrini "qəti şəkildə qəbuledilməz" adlandırıb. Moskva xəbərdarlıq edib ki, İrana qarşı hər hansı hərbi müdaxilə Yaxın Şərq və qlobal təhlükəsizlik üçün fəlakətli nəticələrə səbəb olacaq. Nazirlik həmçinin ABŞ-ın ticarət tariflərini artırmaqla İranın xarici tərəfdaşlarına qarşı "şantaj cəhdlərini" pisləyib.
Rusiya tərəfi qeyd edib ki, İrandakı etirazlar Qərbin sanksiyaları nəticəsində yaranan sosial və iqtisadi problemlərdən qaynaqlanıb. Bəyanatda həmçinin "düşmən xarici qüvvələrin" gərginlikdən istifadə edərək İran dövlətini məhv etməyə çalışdığı və xaricdən təlimat alan silahlı təxribatçıların zorakılığı qızışdırdığı vurğulanıb. Rusiya XİN vəziyyətin tezliklə sabitləşəcəyinə ümid etdiyini bildirərək ölkədəki Rusiya vətəndaşlarına izdihamlı yerlərdən uzaq durmağı tövsiyə edib.
