BAKI, AzerVoice, Nailə Babazadə
Avropa Komissiyasının sədri Ursula fon der Lyayen Davosda keçirilən Dünya İqtisadi Forumunda (WEF) çıxışı zamanı ABŞ-ın Avropa ölkələrinə qarşı tətbiq etməyi planlaşdırdığı əlavə gömrük rüsumlarını "səhv" adlandırıb.
AzerVoice xəbər verir ki, o bildirib ki, Aİ və ABŞ ötən ilin iyulunda ticarət sazişi üzrə razılığa gəliblər və bu razılaşmaya sadiq qalmaq müttəfiqlik borcudur. Fon der Lyayen ABŞ-ın atdığı qeyri-ədalətli addımların yalnız rəqiblərin maraqlarına xidmət edəcəyini vurğulayaraq, Avropanın bu cür addımlara cavabının vahid və mütənasib olacağını qeyd edib.
Fon der Lyayen çıxışında həmçinin Arktika bölgəsinin təhlükəsizliyi və Qrenlandiya ilə bağlı məsələlərə toxunub. O, Qrenlandiya və Danimarka Krallığı ilə tam həmrəy olduqlarını, ərazi suverenliyinin müzakirə edilə bilməyəcəyini vurğulayıb. Aİ-nin Arktika təhlükəsizliyini mərkəzə alan yeni bir dəstək paketi üzərində işlədiyini deyən Komissiya sədri, Qrenlandiyada genişmiqyaslı investisiya həmləsinə başlayacaqlarını və yerli iqtisadiyyatı dəstəkləyəcəklərini açıqlayıb.
Avropanın geosiyasi sarsıntılardan bir fürsət kimi istifadə edərək yeni bir "müstəqillik forması" inşa etməli olduğunu bildirən fon der Lyayen, Ukraynaya yardımların davam edəcəyini də təsdiqləyib. O, Ukraynanın müdafiə qabiliyyətini və əsas xidmətlərini təmin etmək üçün 2026-2027-ci illəri əhatə edən 90 milyard avroluq kredit ayrılmasına qərar verildiyini bildirib. Eyni zamanda, Avropanın tədarük zəncirlərini şaxələndirdiyini, yaxın gələcəkdə Hindistan ilə tarixi bir ticarət sazişi imzalamaq ərəfəsində olduqlarını və Avstraliya, Filippin, Malayziya kimi ölkələrlə də danışıqların müsbət məcrada davam etdiyini diqqətə çatdırıb.
