Bakı, AzerVoice, Nailə Babazadə

İndoneziyanın Yava adasının şərqində yerləşən Semeru vulkanı beş dəfə püskürərək 1000 metr hündürlüyədək kül tullayıb.

AzerVoice xəbər verir ki, Lumacang və Malanq bölgələrinin sərhədində yerləşən Semeru vulkanı yenidən aktivləşib.

Bildirilir ki, vulkan yerli vaxtla 00:28-dən 08:06-dək olan müddətdə 5 dəfə püskürüb və 600–1000 metr hündürlüyə qədər kül sütunu formalaşdırıb.

Semeru Müşahidə Stansiyasının rəsmisi Lisvanto İndoneziyanın xəbərdarlıq sisteminə əsasən vulkanın təhlükə səviyyəsinin “3-cü səviyyə” olduğunu açıqlayıb.

O, püskürmə nəticəsində atıla biləcək qaya parçaları ilə əlaqədar vulkanın ətrafında 5 kilometrlik radiusda bütün fəaliyyətlərin qadağan edildiyini bildirib.

Bromo-Tengger-Semeru Milli Parkının ərazisinə daxil olan Semeru vulkanı Yava adasının ən aktiv vulkanlarından biri hesab olunur.