BAKI,VOA, Nailə Babazadə

Əfqanıstanın rəsmi nümayəndəsi Həmdullah Fitrət Pakistanın hava və quru hücumları nəticəsində yaranan ağır fəsadları açıqlayıb. Onun sözlərinə görə, hücumlar nəticəsində 110 nəfər həlak olub, 123 nəfər yaralanıb. Paktiya, Paktika, Xost, Kabil, Nanqarhar, Kunar və Qəndəhar bölgələrində 350 ev tamamilə və ya qismən dağılıb, 8 min 400 ailə isə evlərini tərk etmək məcburiyyətində qalıb.

VOA xəbər verir ki, Əfqanıstan Müdafiə Nazirliyinin sözçüsü Enayatullah Xavarazmi bildirib ki, cavab tədbirləri nəticəsində Pakistan tərəfinin 35 təhlükəsizlik məntəqəsi hədəf alınıb və təxminən 150 Pakistan əsgəri öldürülüb. O, həmçinin 28 əfqan əsgərinin həyatını itirdiyini, 42-nin isə yaralandığını təsdiqləyib.

Gərginliyin əsas səbəbi Pakistanın "terror düşərgəsi" adlandırdığı 7 nöqtəni hədəf almasıdır. İslamabad administrasiyası iddia edir ki, Pakistan Talibanı (TTP) Əfqanıstan ərazisində, xüsusilə Britaniya müstəmləkə dövründən qalan və sərhəd funksiyasını yerinə yetirən Durand xətti boyunca mövqe tutaraq Pakistana hücumlar təşkil edir. Kabil isə bu iddiaları rədd edərək, TTP-nin onların torpaqlarında fəaliyyət göstərmədiyini müdafiə edir.