BAKI, VOA, Nailə Babazadə
İran Qızıl Aypara Cəmiyyətinin sədri Pir Hüseyn Kolivənd ABŞ və İsrailin həyata keçirdiyi hərbi əməliyyatlar nəticəsində ölkə daxilində 4 mindən çox mülki binanın ciddi zərər gördüyünü açıqlayıb.
VOA xəbər verir ki, "Mehr" xəbər agentliyinə danışan Kolivənd qeyd edib ki, indiyədək 3 min 646 yaşayış evi və mülki tikili hücumlara məruz qalıb, 528 ticarət obyekti isə tamamilə məhv edilib. Hücumların miqyası səhiyyə infrastrukturundan da yan keçməyib; İranlı rəsminin sözlərinə görə, 3 xəstəxana fəaliyyətini tamamilə dayandırmalı olub, 14 tibb mərkəzi isə müxtəlif dərəcəli dağıntılara məruz qalıb.
Bu dağıntılar fevralın 28-də Tehran və Vaşinqton administrasiyaları arasında danışıqların davam etdiyi bir vaxtda İsrail və ABŞ-ın İrana qarşı başlatdığı genişmiqyaslı hərbi əməliyyatların nəticəsidir. İran tərəfi bu zərbələrə cavab olaraq İsraillə yanaşı, ABŞ bazalarının yerləşdiyi Qətər, Birləşmiş Ərəb Əmirlikləri və Bəhreyn kimi region ölkələrindəki müəyyən hədəfləri raket atəşinə tutub. Münaqişənin gedişində İranın ali lideri Ayətullah Əli Xameneyi də daxil olmaqla bir çox yüksək rütbəli rəsmi həlak olub, ölkənin müxtəlif şəhərlərində isə minlərlə insanın həyatını itirdiyi bildirilir.
Hazırda İranın bir çox bölgəsində humanitar vəziyyət kritik həddə çatıb. Tibb mərkəzlərinin sıradan çıxması yaralıların müalicəsini çətinləşdirir, mülki binaların dağılması isə minlərlə ailənin sığınacaqsız qalmasına səbəb olub. Beynəlxalq humanitar təşkilatlar bölgədəki mülki itkilərin və infrastruktur dağıntılarının qarşısının alınması üçün təcili atəşkəs çağırışlarını davam etdirirlər.
