BAKI, VOA, Nailə Babazadə
Tehranın bələdiyyə sədri Əlirza Zakani İran dövlət televiziyasına verdiyi açıqlamada ABŞ və İsrailin ölkəyə qarşı həyata keçirdiyi hərbi əməliyyatların görünməmiş miqyasına diqqət çəkib.
VOA xəbər verir ki, Zakani bildirib ki, cari müharibənin ilk 10 günü ərzində ölkə ərazisində 9 min nöqtə hücumlara məruz qalıb. Müqayisə üçün o xatırladıb ki, ötən ilin iyun ayında baş verən və 12 gün davam edən silahlı münaqişə zamanı cəmi 1450 nöqtə hədəf alınmışdı. Hazırda paytaxtda və digər şəhərlərdə genişmiqyaslı dağıntıların aradan qaldırılması və dağıntılar altından təmizləmə işlərinin aparıldığı vurğulanıb.
Bu intensiv hücumlar fevralın 28-də Tehran və Vaşinqton arasında danışıqların davam etdiyi bir vaxtda İsrail və ABŞ-ın başlatdığı hərbi əməliyyatların nəticəsidir. İran tərəfi də buna cavab olaraq İsraillə yanaşı, ABŞ bazalarının yerləşdiyi Qətər, Birləşmiş Ərəb Əmirlikləri və Bəhreyndə müəyyən etdiyi hədəflərə zərbələr endirib. Münaqişənin gedişində İranın ali lideri Ayətullah Əli Xameneyi də daxil olmaqla bir çox yüksək rütbəli rəsmi həyatını itirib. Hazırkı müharibə həm hədəflərin sayı, həm də dağıntıların miqyasına görə regionda son onilliklərin ən şiddətli qarşıdurması kimi qiymətləndirilir.
İran rəsmilərinin təqdim etdiyi son statistikaya görə, cari hücumlarda ölənlərin sayı 1348-i, yaralıların sayı isə 17 mini ötüb. Müqayisə üçün qeyd edək ki, 13-24 iyun 2025-ci il tarixlərində baş vermiş əvvəlki hücum dalğasında 935 nəfərin öldüyü açıqlanmışdı. Rəqəmlər göstərir ki, builki əməliyyatlar həm hərbi texnikanın tətbiqi, həm də mülki infrastrukturun zərər görməsi baxımından daha dağıdıcı xarakter daşıyır. Beynəlxalq humanitar təşkilatlar bölgədəki vəziyyətin kritik olduğunu və təcili müdaxiləyə ehtiyac duyulduğunu bildirirlər.
