BAKI, VOA, Nailə Babazadə
İranın Səudiyyə Ərəbistanındakı "Şahzadə Sultan" hava bazasına endirdiyi raket zərbələri nəticəsində ABŞ Hərbi Hava Qüvvələrinə məxsus strateji texnikalara ciddi ziyan dəyib.
VOA xəbər verir ki, "Wall Street Journal" (WSJ) qəzetinin ABŞ rəsmilərinə istinadən yaydığı məlumata görə, son günlərdə həyata keçirilən hücumlar zamanı ABŞ-a məxsus 5 yanacaqdoldurma təyyarəsi uçuş zolağında olarkən zərbələrə məruz qalıb. Bildirilir ki, hadisə zamanı can itkisi olmasa da, təyyarələr tamamilə məhv edilməyib, lakin ciddi zədələnib. Hazırda həmin təyyarələrin təmiri istiqamətində işlər aparılır.
Bu son hadisə ilə birlikdə, ABŞ-ın cari münaqişə ərzində zədələnən və ya məhv edilən yanacaqdoldurma təyyarələrinin sayının 7-yə yüksəldiyi iddia olunur.
Eyni zamanda, ABŞ Mərkəzi Komandanlığı (CENTCOM) İrana qarşı əməliyyatlarda iştirak edən iki "KC-135" tipli yanacaqdoldurma təyyarəsindən birinin İraqın qərbində qəzaya uğradığını təsdiqləyib. Qəza nəticəsində təyyarədə olan 6 heyət üzvünün hamısı həyatını itirib.
Fevralın 28-də ABŞ və İsrailin İrana qarşı başladığı hərbi əməliyyatlara cavab olaraq, Tehran rəhbərliyi regiondakı ABŞ bazalarını hədəf almağa davam edir. Səudiyyə Ərəbistanı ilə yanaşı, Küveyt, BƏƏ və Qətərdəki ABŞ hərbi obyektləri də İranın raket zərbələri ilə üzləşib.
Xatırladaq ki, ABŞ və İsrailin hücumları nəticəsində İranın ali rəhbəri Ayətullah Əli Xameneyi və bir çox yüksək rütbəli rəsmi həlak olub. İran rəsmi dairələri ölkə daxilində ölənlərin sayının 1348-i keçdiyini, 17 mindən çox insanın isə yaralandığını bildirir.
