BAKI, VOA, Nailə Babazadə
Şimali Koreyanın ard-arda həyata keçirdiyi raket sınaqları regionda gərginliyi yenidən artırıb. Cənubi Koreya və Yaponiya rəsmiləri Pxenyanın Yaponiya dənizi (Şərq dənizi) istiqamətinə çox sayda ballistik raket fırlatdığını elan ediblər.
VOA xəbər verir ki, Cənubi Koreya Baş Qərargahından verilən məlumata görə, Pxenyan yaxınlığındakı Sunan bölgəsindən təxminən 10 ədəd ballistik raket buraxılıb. Seul rəhbərliyi növbəti raket sınaqları ehtimalına qarşı ordunun tam hazır vəziyyətə gətirildiyini və hadisə ilə bağlı təfərrüatların ABŞ və Yaponiya tərəfi ilə paylaşıldığını bildirib.
Yaponiyanın "Kyodo" agentliyinin xəbərinə görə, ölkənin Müdafiə Nazirliyi raketlərin Yaponiyanın müstəsna iqtisadi zonasından kənara düşdüyünü təxmin edir. Yaponiya Baş naziri Takaiçi Sanae hökumət rəsmilərinə məlumatların toplanması, bölgədəki təyyarə və gəmilərin təhlükəsizliyinin təmin edilməsi barədə təcili göstəriş verib.
Şimali Koreyanın bu addımı beynəlxalq ictimaiyyət tərəfindən regionda sabitliyi pozan növbəti təhrikedici hərəkət kimi qiymətləndirilir.
