BAKI,VOA, Fərid Mikayılov
Türkmənistan–Əfqanıstan–Pakistan–Hindistan (TAPI) qaz kəməri layihəsi üzrə danışıqlarda yeni mərhələyə keçilib. Layihənin Əfqanıstan ərazisindən keçən hissəsi üçün torpaq məsələlərinin həlli istiqamətində razılaşmalar əldə olunub.
VOA xəbər verir ki, martın 15-də Kabildə Əfqanıstanın kənd təsərrüfatı, suvarma və heyvandarlıq naziri Ataulla Omari ilə “TAPI Pipeline Company Ltd.” konsorsiumunun rəhbəri Muhammetmyrat Amanov və Türkmənistanın ölkədəki səfiri Hoja Övezov arasında görüş keçirilib.
Görüşdə qaz kəmərinin keçəcəyi marşrut üzrə torpaq münasibətlərinin tənzimlənməsi əsas müzakirə mövzusu olub. Tərəflər boru kəmərinin keçəcəyi ərazilərdə dövlət və özəl torpaqların icarəsi və satın alınması üçün qiymət mexanizmlərinin müəyyənləşdirilməsi üzərində işlədiklərini bildiriblər.
Konsorsium rəhbəri Muhammetmyrat Amanov layihənin tikinti qrafikindən geri qalmaması üçün torpaqların alınması prosesinin mümkün qədər qısa müddətdə başa çatdırılmasının vacibliyini vurğulayıb.
Məlumata görə, hazırda texniki qrupların iştirakı ilə Əfqanıstanın Herat vilayətində qaz kəmərinin keçəcəyi marşrutların dəqiqləşdirilməsi üzrə işlər aktiv şəkildə davam edir.
Əfqanıstan tərəfi isə TAPI layihəsinin ölkənin iqtisadi inkişafı və regional enerji əməkdaşlığı baxımından strateji əhəmiyyət daşıdığını qeyd edib.
