Əbu-Dabi İnvestisiya Ofisi (ADIO) və Almaniyanın “Bayer” şirkəti səhra şəraitində kənd təsərrüfatı sınaqları, innovativ müalicə üsulları və səhiyyə xidmətlərinə çıxış sahələrində əməkdaşlıq edəcək.

ArabAZ xəbər verir ki, tərəflər arasında imzalanan Anlaşma Memorandumu (MoU) səhiyyə, kənd təsərrüfatı, xeyriyyəçilik və Əbu-Dabinin innovasiya ekosistemində birgə layihələrin müəyyənləşdirilməsi üçün çərçivə yaradır.

Əməkdaşlığın əsas istiqamətlərindən biri Birləşmiş Ərəb Əmirliklərində ərzaq təhlükəsizliyinin gücləndirilməsi məqsədilə bitkilərin səhra və quraq iqlim şəraitində məhsuldarlığının öyrənilməsi üzrə sahə sınaqlarının keçirilməsidir.

Bundan əlavə, tərəflər səhiyyə innovasiyaları və müasir müalicə üsullarına çıxış imkanlarını, həmçinin səhiyyə və ərzaq təhlükəsizliyi sahələrində xeyriyyə layihələrini nəzərdən keçirəcəklər.

Əməkdaşlıq ADIO-nun ərzaq və su sistemlərinin gücləndirilməsinə yönəlmiş “AgriFood Growth and Water Abundance” (AGWA) klasterinin fəaliyyətini dəstəkləyir. Səhiyyə istiqamətində isə əməkdaşlıq “Health, Endurance, Longevity and Medicine” (HELM) klasterinin innovasiya və qabaqcıl biologiya elmləri sahəsində fəaliyyətinə töhfə verəcək.

Memorandum BƏƏ Prezidenti Məhəmməd bin Zayed Al Nəhyanın Almaniyaya dövlət səfəri çərçivəsində imzalanıb.

Sənədi ADIO adından Baş Ticarət və Sənaye Direktoru Məhəmməd Əli Əl-Kamali, “Bayer” adından isə İctimaiyyətlə Əlaqələr, Davamlı İnkişaf və Təhlükəsizlik üzrə İcraçı vitse-prezident Mattias Berninger imzalayıb.

Tərəflər sazişin bilik mübadiləsini gücləndirəcəyini, eləcə də daha dayanıqlı səhiyyə və ərzaq sistemlərinin inkişafına yönəlmiş gələcək təşəbbüslərə dəstək verəcəyini bildiriblər.