BAKI,VOA, Nailə Babazadə
ABŞ Mərkəzi Komandanlığının (CENTCOM) komandanı admiral Bred Kuper İrana qarşı həyata keçirilən hərbi əməliyyatların gedişatı ilə bağlı mühüm açıqlamalar verib. Əməliyyatın dördüncü həftəsində olduqlarını qeyd edən admiral, qarşıya qoyulan hərbi məqsədlərə planlaşdırılandan daha sürətlə nail olduqlarını bildirib.
VOA xəbər verir ki, Bred Kuperin sözlərinə görə, ABŞ qüvvələri indiyədək İranın 10 mindən çox hərbi hədəfinə zərbə endirib. O, xüsusilə İran hərbi dəniz qüvvələrinin ağır itkilər verdiyini vurğulayıb.
"Onilliklərdir bölgə sularında qlobal dəniz ticarətini təhdid edən İran donanmasının ən böyük gəmilərinin 92 faizini yox etmişik. Artıq o günlər geridə qaldı." - deyə qeyd edilib.
CENTCOM komandanı əlavə edib ki, hazırda İran regionda dəniz gücü nümayiş etdirmək qabiliyyətini tamamilə itirib. Aparılan əməliyyatlar nəticəsində İranın pilotsuz uçuş aparatları (PUA) və raket buraxılışlarının sayı 90 faizdən çox azalıb. Admiral Kuper bunun həm ABŞ qüvvələrinə, həm də bölgə ölkələrinə qarşı hücum potensialının əhəmiyyətli dərəcədə zəifləməsi mənasını verdiyini qeyd edib.
Xatırladaq ki, fevralın 28-də ABŞ və İsrailin İrana qarşı başladığı hərbi hücumlar nəticəsində İranın ali rəhbəri Əli Xameneyi də daxil olmaqla, bir çox yüksək rütbəli rəsmi şəxs həlak olub. Tehran rəhbərliyi isə buna cavab olaraq ABŞ-ın Qətər, BƏƏ və Bəhreyndəki bazalarını hədəf alıb.
