BAKI, VOA, Nailə Babazadə
"Associated Press" (AP) agentliyinin ABŞ, İsrail və bir sıra Körfəz ölkələrinin rəsmilərinə istinadən yaydığı məlumata görə, Vaşinqtonun regiondakı müttəfiqləri İrana qarşı hava hücumlarının dayandırılmamasını tələb edirlər.
VOA xəbər verir ki, iddia olunur ki, Səudiyyə Ərəbistanı, Birləşmiş Ərəb Əmirlikləri (BƏƏ), Küveyt və Bəhreyn rəsmiləri özəl görüşlərdə İranın hərbi gücünün "kifayət qədər zəiflədilmədiyini" bildiriblər. Müttəfiq ölkələr İran rəhbərliyində köklü dəyişikliklər baş verənə və ya Tehranın regional siyasətində ciddi dönüş yaranana qədər hərbi əməliyyatların sonlandırılmamasını istəyirlər.
Mənbələr qeyd edir ki, Səudiyyə Ərəbistanı və BƏƏ İrana qarşı hərbi təzyiqin artırılması çağırışlarına rəhbərlik edir. Xüsusilə BƏƏ-nin ABŞ-ın İrana quru qoşunları yeritməsi üçün Vaşinqtona "intensiv təzyiq" göstərdiyi, Küveyt və Bəhreynin də bu mövqeyi dəstəklədiyi irəli sürülür. Səudiyyə Ərəbistanı rəsmiləri isə Ağ Evə bildiriblər ki, hücumların indiki mərhələdə dayandırılması qonşu ölkələrin təhlükəsizliyini təmin edəcək "yaxşı razılaşma"nın əldə olunmasına imkan verməyəcək.
Müzakirələrdən xəbərdar olan mənbənin sözlərinə görə, Səudiyyə Ərəbistanının vəliəhd şahzadəsi Məhəmməd bin Salman Ağ Ev rəsmiləri ilə görüşündə İranın hərbi gücünün və dini rəhbərliyinin zəiflədilməsinin həm Körfəz regionu, həm də daha geniş coğrafiya üçün uzunmüddətli maraqlara xidmət edəcəyini vurğulayıb. Ağ Ev isə hələlik bu iddialarla bağlı hər hansı rəsmi şərh verməkdən imtina edib.
Xatırladaq ki, fevralın 28-də ABŞ və İsrail tərəfindən başladılan əməliyyatlar nəticəsində İranın ali lideri Əli Xamenei də daxil olmaqla bir çox yüksək rütbəli rəsmi həlak olub. Buna cavab olaraq İran da İsrail və ABŞ-ın regiondakı bazalarına, o cümlədən BƏƏ, Qətər və Bəhreyn ərazilərinə raket zərbələri endirib. Hazırda müttəfiq dövlətlərin bu hücumlar qarşısında ABŞ-dan daha qətiyyətli addımlar gözlədiyi bildirilir.
