BAKI,VOA, Nailə Babazadə
İsrailin Somalilandın birtərəfli müstəqillik elan etməsi prosesinə daxil olması regionun yeni qarşıdurma meydanına çevrilməsinə səbəb ola bilər. Təəssüf ki, yaxın gələcəkdə Ərəbistan yarımadasının cənubunda da yeni silahlı qrupların ortaya çıxdığını görə bilərik.
VOA xəbər verir ki bu xəbərdarlıqla Somalinin Xarici İşlər və Beynəlxalq Əməkdaşlıq üzrə Dövlət naziri Əli Mohamed Omar çıxış edib.
Nazir bu fikirləri "Antalya Diplomasi Forumu (ADF) 2026" çərçivəsində keçirilən "Vasitəçilikdə Regional Sahiblik: Afrika Buynuzu Nümunəsi" adlı paneldə səsləndirib. Omar qeyd edib ki, İsrailin olduğu hər yerdə ona qarşı çıxan digər aktorlar da fəallaşır və bu, bölgədəki gərginliyi daha da dərinləşdirir.
Panel zamanı Somali və Efiopiya arasındakı gərginlikdə Türkiyənin oynadığı rol xüsusi vurğulanıb. Nazir Omar Türkiyənin vasitəçilik modelini həm regional, həm də qitə miqyasında nümunəvi model kimi xarakterizə edib. Şərqi Afrikada Hökumətlərarası İnkişaf Qurumunun (IGAD) rəsmisi Mohamed Abdi Ware də Türkiyənin hər iki tərəflə qurduğu etibarlı münasibətləri və tərəfsiz mövqeyini uğurlu vasitəçiliyin əsas amili kimi qeyd edib.
Ekspertlər bildiriblər ki, Türkiyənin bu uğuru təkcə mədəni bağlarla deyil, həm də tərəflər arasında hiyerarxiya yerinə hörmətə əsaslanan yanaşma tərzi ilə bağlıdır. Vurğulanıb ki, səmərəli vasitəçilik üçün yalnız xoş məram kifayət deyil, eyni zamanda güclü institusional potensial və etimad vacibdir.
