Sədəqə Allah yolunda xərcləmə, Allahın razılığını qazanmaq üçün təmənnasız edilən maddi-mənəvi yardım və görülən hər cür xeyir işdir. Qurani-Kərimdə buyurulduğu kimi: "Xoş bir söz və bağışlamaq, arxasınca əziyyət (minnət) edilən sədəqədən daha xeyirlidir. Allah heç bir şeyə möhtac deyildir, həlimdir (cəzaları təxirə salandır)" (Bəqərə surəsi, 263-cü ayə).

Hədislərdə bildirilən və ictimai həyatın bir çox sahələrini əhatə edən nafilə sədəqə və yardımlaşma şəkillərinin dünyada da, axirətdə də böyük faydaları vardır. Ən fəzilətli sədəqələrdən biri ehtiyac sahibi olan insanın çətinliyini aradan qaldırmaq, onun ehtiyaclarını qarşılamaqdır. Sədəqə həmçinin onu verəcək olan şəxsin imkanına və vəziyyətinə görə dəyişir. O, günahlara kəffarə, Cəhənnəm atəşinə qarşı sipərdir; bəla və müsibətləri dəf edir. İnsan ondan yardım istəyəni əliboş qaytarmamalı, imkanı daxilində kömək etməyə çalışmalıdır.

Bundan əlavə, sədəqənin gizli verilməsi daha fəzilətlidir. Çünki edilən yaxşılığı kənar şəxslər bildikdə, insanın qəlbinə özündən asılı olmayaraq riyaçılıq və göstəriş meyli daxil ola bilər. Bu barədə hədislər olduqca çoxdur. Belə ki, Allah Rəsulu buyurmuşdur: "Üç şey var ki, yaxşılığın xəzinələrindəndir; onlardan biri insanın verdiyi sədəqəni gizləməsidir".