BAKI,VOA, Nailə Babazadə
Birləşmiş Millətlər Təşkilatının (BMT) xüsusi məruzəçiləri Avropa Birliyinə müraciət edərək, İsrail ilə 2000-ci ildən bəri qüvvədə olan tərəfdaşlıq sazişinin dərhal dayandırılmasını tələb ediblər.
VOA xəbər verir ki, məruzəçilər bu tələbi İsrailin beynəlxalq hüququ, o cümlədən insan haqlarını kobud şəkildə pozması və Qəzzada törədilən hərbi cinayətlərlə əsaslandırıblar.
Bəyanatda vurğulanır ki, Avropa Birliyinə üzv ölkələrin xarici işlər nazirlərinin Lüksemburqda keçiriləcək növbəti toplantısı birlik üçün ciddi bir mənəvi sınaq olacaq. Belə ki, İsrailə Avropa bazarına güzəştli çıxış imkanı verən bu sazişin davam etdirilməsi beynəlxalq hüquq normaları ilə ziddiyyət təşkil edir. Məruzəçilərin fikrincə, Beynəlxalq Ədalət Məhkəməsinin Qəzzadakı vəziyyətlə bağlı xəbərdarlıqlarını nəzərə alaraq sazişin dondurulması artıq siyasi seçim deyil, hüquqi bir öhdəlikdir.
Eyni zamanda, Avropa ictimaiyyəti də bu istiqamətdə təzyiqləri artırır. "Avropa Vətəndaş Təşəbbüsü" çərçivəsində İsrailə qarşı iqtisadi sanksiyaların tətbiq olunması və sazişin tamamilə dayandırılması tələbi ilə artıq bir milyondan çox imza toplanıb.
Xatırladaq ki, Avropa Birliyi daxilində İsrailin beynəlxalq hüququ pozduğuna dair müxtəlif araşdırmalar aparılsa da, indiyədək Brüssel tərəfindən sazişin dayandırılması ilə bağlı qəti qərar qəbul edilməyib. BMT ekspertləri isə bildirirlər ki, insanlıq əleyhinə cinayətlərdə ittiham olunan bir dövlətlə imtiyazlı ticarət əlaqələrini sürdürmək Avropa Birliyinin mənəvi dəyərləri və beynəlxalq öhdəlikləri ilə bir araya sığmır.
