BAKI,VOA, Nailə Babazadə
Avropa Parlamentinin Sol Qrupundan olan belçikalı deputatlar Rudi Kennes və Mark Botenqa üzv ölkələrin Avropa İttifaqı ilə İsrail arasındakı Ortaqlıq Sazişini dayandıra bilməməsini kəskin pisləyiblər.
VOA xəbər verir ki, Botenqa bu vəziyyəti böyük bir utanc adlandıraraq ittifaqın Rusiyaya qarşı mədəniyyət tədbirlərinə görə dərhal sanksiya tətbiq etdiyini lakin Livanı bombalayan və Fələstində etnik təmizləmə aparan İsrailə qarşı hərəkətsiz qaldığını vurğulayıb.
Deputatın sözlərinə görə İsrail ilə mövcud olan tərəfdaşlıq sazişi birbaşa insan hüquqları prinsiplərinə söykənir və bu prinsiplərin pozulmasına rəğmən sənədin qüvvədə qalması Avropa İttifaqının öz qanunlarına hörmətsizliyidir. Botenqa Avropa ölkələrini beynəlxalq hüquqa sayğı duymamaqda ittiham edərək bu ortaqlığı yalan adlandırıb.
Digər deputat Rudi Kennes də bənzər fikirlər səsləndirərək Avropa Parlamentinin Qəzzada baş verənləri hələ də soyqırım kimi tanıya bilməməsini rəzalət hesab etdiyini bildirib. O qeyd edib ki Avropa İttifaqı bir tərəfdən digər rejimlərə beynəlxalq hüquqa əməl etməyi tapşırarkən digər tərəfdən özü bu qaydaları pozmaqla etibarını itirir.
Kennes bu cür ikili standartların gələcək nəsillər üçün ağır məsuliyyət yükü yaratdığını və Avropanın böyük lobbilərin təsiri altında olduğunu diqqətə çatdırıb. O Avropa İttifaqı rəhbərliyinin beynəlxalq hüquq pozuntuları və humanitar böhran qarşısında susqunluğunu mənəvi baxımdan qəbulolunmaz adlandırıb.
