BAKI,VOA,Yusif Şərifzadə

Beynəlxalq Miqrasiya Təşkilatı Livanda məcburi köçkünlərin geri dönüşü ilə bağlı yeni məlumat yayıb. Bildirilir ki, son razılaşmadan sonra yüz minlərlə insan yaşadığı ərazilərə qayıdıb.

VOA xəbər verir ki, Beynəlxalq Miqrasiya Təşkilatının açıqlamasına əsasən, ötən ay ABŞ ilə İran arasında əldə olunmuş və Livanda atəşkəsi də əhatə edən razılaşmadan sonra 640 mindən çox məcburi köçkün evinə qayıdıb.

Məlumata görə, iyunun 22-dən etibarən yerli qurumlarla birgə toplanmış məlumatlar göstərir ki, hazırda təxminən 500 min nəfər hələ də məcburi köçkün vəziyyətində yaşayır.

Təşkilat bildirib ki, Livanın cənub sərhədi yaxınlığında yerləşən onlarla şəhər və kəndə qayıdış hələ də mümkün deyil. Buna səbəb həmin yaşayış məntəqələrinin böyük hissəsinin ciddi dağıntılara məruz qalmasıdır.

Məlumatda qeyd olunur ki, atəşkəs qüvvədə olsa da, İsrail qüvvələri Livanın cənubunda təxminən 10 kilometr dərinliyində yerləşən təhlükəsizlik zonasındakı mövqelərini qoruyub saxlayırlar.