BAKI,VOA,Yusif Şərifzadə

ABŞ Ədliyyə Nazirliyi Hindistanlı milyarder Qautam Adaniyə qarşı irəli sürülən ittihamların ləğvini tələb edib.

VOA xəbər verir ki, nazirlik məhkəməyə təqdim etdiyi sənəddə işin əsasən xarici yurisdiksiyaya aid olduğunu və sübut edilməsinin çətin olduğunu bildirib.

Məlumata görə, ABŞ Dairə Məhkəməsinin hakimi Nikolas Qaraufis ötən ay prokurorlardan Adaniyə qarşı işin niyə geri götürüldüyünü əsaslandırmağı tələb etmişdi.

Ədliyyə Nazirliyi isə 10 səhifəlik sənədlə ittihamların ləğvini müdafiə edərək işin ABŞ maraqları ilə birbaşa bağlı olmadığını vurğulayıb.

Sənəddə əvvəlki administrasiya dövründə açılan işin “məhkəmə prosesi üçün real perspektivi olmayan ittiham kampaniyası” olduğu iddia edilib.

Həmçinin qeyd olunub ki, iddia edilən ödənişlər Hindistan vətəndaşları tərəfindən Hindistan daxilində həyata keçirilib və ABŞ şirkətləri və ya milli təhlükəsizliklə əlaqəsi yoxdur.

ABŞ tərəfi bu səbəbdən işin davam etdirilməsinin məqsədəuyğun olmadığını bildirir.