Bakı. VOA :

İsrail ordusunun Qəzzanın şimalında üç evə həyata keçirdiyi hücumlarda biri körpə olmaqla 14 fələstinli ölüb, çox sayda insan yaralanıb.

VOA xəbər verir ki, Fələstinin WAFA xəbər agentliyinin yerli mənbələrdən verdiyi məlumata görə, İsrail döyüş təyyarələri Qəzza şəhərinin Ət-Tuffah və Əl-Şücayyə məhəllələrində üç evə hücum edib.

Hücumlarda aralarında körpə, qadın və uşaqların da olduğu 14 nəfər həyatını itirib, çox sayda insan yaralanıb. Yaralılar Əl-Əhli Baptist Xəstəxanasına yerləşdirilib.

İsrailin 7 oktyabrdan bəri Qəzza zolağına təşkil etdiyi hücumlarda ən az 15 min 694-ü uşaq, 10 min 279-u qadın olmaqla 37 min 266 fələstinli öldürülüb, 85 min 102 nəfər isə yaralanıb.

Təxminən 34 min uşaq yaralanıb, 3 min 600 uşaq dağıntılar altında itib.

İsrail ordusu ən az 200 fələstinli uşağı qaçırıb, 17 min uşaq yetim qalıb, onlardan təxminən 510-u anasını itirib.

700 mindən çox uşaq Qəzza zolağındakı evlərini tərk etmək məcburiyyətində qalıb. İsrail ordusunun hücumları nəticəsində 650 min uşağın yaşadığı evlər dağılıb.