BAKI,VOA,Yusif Şərifzadə
ABŞ “Fələstin Fəaliyyəti” hərəkatına sanksiya tətbiq edərək onu “xüsusi təyin edilmiş qlobal terrorçu” kimi siyahıya daxil edib. Bu barədə ABŞ Maliyyə Nazirliyi məlumat yayıb.
VOA xəbər verir ki, ABŞ-nin qərarı ilə “Fələstin Fəaliyyəti” hərəkatı sanksiyalara məruz qalan qurumlar siyahısına əlavə olunub.
“Fələstin Fəaliyyəti” özünü İsrailin siyasətinə beynəlxalq dəstəyin dayandırılmasına çalışan birbaşa fəaliyyət hərəkatı kimi təqdim edir.
Böyük Britaniyada yaradılan hərəkatın fəaliyyəti bu ölkədə də qadağan edilib.
Bununla yanaşı, bir sıra insan hüquqları təşkilatları Böyük Britaniyanın hərəkatla bağlı qərarını tənqid ediblər.
“Beynəlxalq Əfv” təşkilatı da qadağaya etiraz edən qurumlar sırasındadır. Təşkilat bu addımın terrorçuluqla mübarizə səlahiyyətlərinin düzgün tətbiq edilməməsi olduğunu və etiraz hüququna təhlükə yaratdığını bildirib.
ABŞ-nin yeni qərarı “Fələstin Fəaliyyəti” hərəkatına qarşı tətbiq olunan məhdudiyyətlərin daha da genişlənməsi deməkdir.
