Bakı,AzerVoice
COP29 çərçivəsində Trend BİA “COP for Hope” adlı xüsusi layihəni təqdim edir. Bu layihə iqlim dəyişikliyi ilə mübarizədə vahid məqsəd uğrunda birləşmiş dünya liderlərinin, ölkə rəhbərlərinin və müxtəlif sahələrdə – siyasət, iqtisadiyyat, elm və ekologiyada öncül şəxslərin fikirlərini dinləmək üçün unikal imkan yaradır.
Budəfəki müsahibimiz tanınmış fotoqraf Reza Deqatidir.
O AzerVoice-ə açıqlamasında bildirib ki, COP29 kimi mötəbər tədbirin Azərbaycanda keçirilməsi böyük uğurdur.
O qeyd edib ki, bu tədbir yaşıl dünyamızı qorumaqla bağlı möhtəşəm tədbirdir:
“Azərbaycan bu tədbirlə dünyaya sübut edir ki, nələrə qadirdir. Bu tədbirdən istifadə edib Azərbaycanın necə qüdrətli ölkə olduğunu qonaqlara və dünyaya göstəririk.”
Tanınmış fotoqraf Qarabağda aparılan bərpa-quruculuq işlərinə də toxunub.
"İşğaldan azad edilməsinə baxmayaraq Qarabağda çox sürətli bərpa-quruculuq işləri aparılır. Avropa dövlətləri Azərbaycanın dörd ilə gördüyü işi qırx ilə görərdi”,- o qeyd edib.
Qeyd edək ki, dünən BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
