BAKI,VOA, Fərid Mikayılov
Qazaxıstanın paytaxtı Astanada şəhər mobilliyi və aviasiya sahəsində mühüm yenilik təqdim olunacaq.
VOA xəbər verir ki, iyulun 24-də saat 09:00-da “Qazanat” ippodromunun ərazisində ölkə tarixində ilk dəfə aerotaksinin nümayiş uçuşu baş tutacaq.
Təqdimat zamanı səmaya şaquli qalxma və enmə imkanına malik (eVTOL) tam elektrikli “AutoFlight Prosperity” hava gəmisi qalxacaq. Uçuş zamanı 1 pilot və 5 sərnişin üçün nəzərdə tutulmuş bu müasir model saatda 200 km/saat sürət toplamaq və 200 kilometrə qədər məsafə qət etmək gücünə malikdir. Təşkilatçılar qeyd edirlər ki, əlverişsiz hava şəraiti yaranarsa, uçuşun tarixi və vaxtı dəyişdirilə bilər.
Qazaxıstanda eVTOL texnologiyasının ilk nümayiş uçuşu və ölkənin ilk vertiportunun açılışı 2026-cı ilin mayında Alatau şəhərində baş tutmuşdu. 2026-cı ilin iyununda isə aerotaksi, eVTOL və pilotsuz aviasiyanın inkişafını tənzimləyən qanun qüvvəyə minib. Astanada keçiriləcək yeni nümayiş, ölkənin aşağı hündürlük aviasiya infrastrukturunun formalaşmasında növbəti mühüm addım hesab olunur.
