Səudiyyə Ərəbistanının paytaxtı Ər-Riyadda oktyabrın 26-dan 29-dək IX Qlobal Səhiyyə Sərgisi keçiriləcək.
ArabAZ xəbər verir ki,tədbir səhiyyə sektorunun sürətli inkişaf etdiyi və investor marağının artdığı bir vaxtda dünyanın müxtəlif ölkələrindən investorları, innovatorları, tədqiqatçıları, qərar qəbul edən şəxsləri və səhiyyə liderlərini bir araya gətirəcək.
2025-ci ildə keçirilən VIII Qlobal Səhiyyə Sərgisində imzalanan sazişlərin ümumi dəyəri 133 milyard Səudiyyə rialını ötüb. Özəl sektor nümayəndələri arasında imzalanan sazişlərin sayı əvvəlki sərgilərlə müqayisədə altı dəfə artıb.
Ötənilki sərgidə 2 200 brend və səhiyyə sahəsinin aparıcı mütəxəssisləri arasından 600 spiker iştirak edib. Tədbirə 130 mindən çox ziyarətçi qatılıb. Beynəlxalq iştirakçıların sayı isə əvvəlki sərgilərlə müqayisədə 54 faiz artıb.
Budəfəki sərgi Ər-Riyaddakı Malham Sərgi və Konqres Mərkəzində keçiriləcək. Tədbir çərçivəsində investisiya imkanlarının araşdırılması, yeni tərəfdaşlıqların qurulması və təcrübə mübadiləsi ilə yanaşı, səhiyyə sahəsində ən son innovasiyalar, texnologiyalar və həllər təqdim olunacaq.
