Müsəlman Dünya Liqasının baş katibi Şeyx Məhəmməd əl-İssa Qurani-Kərim və Sünnədə elmi möcüzələri araşdıran yeni rəqəmsal ensiklopediyanı təqdim edib. Ensiklopediya elmi araşdırmaları, akademik mənbələri və müxtəlif vizual materialları vahid rəqəmsal platformada birləşdirir.
ArabAZ xəbər verir ki, Şeyx Məhəmməd əl-İssa Məkkədə Müsəlman Dünya Liqasının qərargahında keçirilən beynəlxalq forumun açılışında “Qurani-Kərim və Sünnədə Elmi Möcüzələr üzrə Müsəlman Dünya Liqasının Ensiklopediyası”nı istifadəyə verib. Əl-İssa eyni zamanda Müsəlman Alimlər Təşkilatının sədridir.
Forumda İslam dünyasının müxtəlif ölkələrindən alimlər və tədqiqatçılar iştirak edib. Tədbirin əsas diqqət mərkəzində Qurani-Kərim və Sünnədə elmi möcüzələrlə bağlı araşdırmaların inkişaf etdirilməsi və elmi məlumatların daha geniş auditoriyaya çatdırılması olub.
Müsəlman Dünya Liqasının təqdim etdiyi ensiklopediya bu sahədə ilk rəqəmsal və interaktiv elmi ensiklopediya kimi təqdim olunur. Platforma istifadəçilərə müxtəlif elmi araşdırmaları və əlaqəli materialları rəqəmsal formada nəzərdən keçirmək imkanı verir.
Ensiklopediya 10 dildə hazırlanıb və ümumilikdə 7 500 səhifədən ibarət 15 cildi əhatə edir. Burada elmi ekspertizadan keçirilmiş 500 araşdırmanın yer aldığı bildirilir.
Rəqəmsal ensiklopediyada 2 000 şəkil və 2 000 videodan da istifadə olunub. Bundan əlavə, istifadəçilərə elmi məlumatları daha ətraflı araşdırmaq imkanı verən 4 000 elmi internet səhifəsinə və ekspertizadan keçmiş akademik jurnallara keçid təqdim edilir.
Layihənin əsas məqsədlərindən biri Qurani-Kərim və Sünnədə elmi möcüzələrlə bağlı araşdırmaları müasir rəqəmsal imkanlardan istifadə etməklə daha əlçatan etməkdir.
Təqdimat mərasiminin sonunda Şeyx Məhəmməd əl-İssa elmi möcüzələr mövzusunda tədqiqat və araşdırmalara verdikləri töhfələrə görə bir sıra alimləri mükafatlandırıb.
