Bakı,AzerVoice
18 fevral 2025-ci il tarixində Türk Mədəniyyəti və İrsi Fondunun prezidenti Aktotı Raimkulova Azərbaycan Milli Konservatoriyasının rektoru Kamilə Dadaş-zadə ilə görüşüb.
AzerVoice xəbər verir ki, Fondun prezidenti Kamilə Dadaş-zadəni Azərbaycan Milli Konservatoriyasının rektoru vəzifəsinə yeni təyin olunması münasibətilə təbrik edərək, bu təyinatın Azərbaycanın çox əsirli musiqi irsinin inkişafına və dünya miqyasında daha da tanıdılmasına töhfə verəcəyinə əminliyini ifadə edib.
Aktotı Raimkulova Azərbaycanın zəngin musiqi mədəniyyətinin Türk dünyasının ayrılmaz bir hissəsi olduğunu qeyd edib. Fondun rəhbəri təşkilatın həyata keçirdiyi layihələrdən bəhs edərək, Azərbaycan Milli Konservatoriyası ilə qarşılıqlı əməkdaşlığın perspektivləri barədə fikirlərini bölüşüb.
Azərbaycan Milli Konservatoriyasının fəaliyyəti haqqında ətraflı məlumat verən Kamilə Dadaş-zadə, türk xalqlarının ortaq musiqi ənənələrinin inkişaf etdirilməsi və bu sahədə birgə tərəfdaşlığın vacibliyini vurğulayıb.
Görüşdə qədim Türk mədəni irsinin qorunması və gələcək nəsillərə çatdırılması sahəsində ortaq layihə və tədbirlərin həyata keçirilməsi ətrafında fikir mübadiləsi aparılıb.
