BAKI, AzerVoice
Bakı Ekspo Mərkəzində MÜSİAD Azərbaycan İctimai Birliyi ilə “Caspian Event Organisers” və “Iteca Caspian” şirkətləri arasında birgə əməkdaşlıq haqqında Anlaşma Memorandumu imzalanıb.
AzerVoice xəbər verir ki, bu barədə MÜSİAD Azərbaycandan məlumat verilib.
Memorandumun əsas məqsədi MÜSİAD Azərbaycan üzvlərinin yerli və beynəlxalq sərgilərdə iştirakının təşviqi, sərgi və biznes tədbirləri sahəsində qarşılıqlı informasiya və məsləhət mübadiləsinin gücləndirilməsi, həmçinin iş adamları arasında işgüzar əlaqələrin inkişaf etdirilməsidir. Tərəflər bu çərçivədə qarşılıqlı təşkilati dəstək göstərməyi və ixtisaslaşmış tədbirlərdə iştirakı təşviq etməyi öhdələrinə götürüblər.
Memorandumun imzalanmasından sonra MÜSİAD Azərbaycan İdarə Heyəti üzvləri 18-ci Beynəlxalq Kənd Təsərrüfatı Sərgisini ziyarət ediblər. Sərgi çərçivəsində qablaşdırma məhsulları istehsal edən MÜSİAD Azərbaycan üzvü “ATA PACK” şirkətinin stendi ilə yanaşı, İtaliyanın “Lutrasil” və “Idromeccanica Lucchini” kimi qabaqcıl kənd təsərrüfatı texnologiyaları üzrə ixtisaslaşmış şirkətlərinin stendlərinə də baxış keçirilib.
Bu kimi əməkdaşlıqlar işgüzar əlaqələrin inkişafına və biznes fəaliyyətlərin daha məqsədyönlü təşkili üçün imkan yaradır.
