Suriya Prezidenti Əhməd əş-Şaraa Dubayda Birləşmiş Ərəb Əmirliklərinin vitse-prezidenti, Baş naziri və Dubay əmiri Şeyx Məhəmməd bin Rəşid Al Məktumla görüşərək iki ölkə arasındakı münasibətləri müzakirə edib.

ArabAZ xəbər verir ki, Ərəb Media Sammiti 2026 çərçivəsində keçirilən görüşdə Suriyanın xarici işlər və xaricdə yaşayan suriyalılar naziri Əsəd Həsən əş-Şeybani də iştirak edib.

Əş-Şaraa sammit çərçivəsində Dubayın vəliəhdi Şeyx Həmdan bin Məhəmməd bin Rəşid Al Məktum və Dubay Media Şurasının sədri, Dubay əmirinin ikinci müavini Şeyx Əhməd bin Məhəmməd bin Rəşid Al Məktumla da görüşüb.

Suriya Prezidenti “Gələcəyin Suriyası” adlı sessiyadakı çıxışında ölkədə aparılan yenidənqurma işləri, iqtisadi imkanlar, regional sabitlik və medianın rolu barədə danışıb.

Əş-Şaraa bildirib ki, Suriya altı onillik ərzində inzibati korrupsiya və zəif planlaşdırmanın nəticələri ilə üzləşib və hazırda ölkə özünü və dövlət institutlarını yenidən qurmağa çalışır.

“Bu mərhələnin özünəməxsus şərtləri var. Qarşılaşdığımız çətinliklərə baxmayaraq, mövcud bütün təcrübələrdən yararlanmağa çalışırıq”, – Suriya Prezidenti bildirib.

Əş-Şaraa 2024-cü ilin sonlarında Bəşər Əsəd hakimiyyətinin devrilməsindən sonra ərəb və müsəlman ölkələrinin Suriyaya göstərdiyi dəstəyin suriyalılarda dərin qürur hissi yaratdığını qeyd edib.

O, bu dəstəyin nümunələrindən biri kimi Şeyx Məhəmməd bin Rəşidin Dəməşqdə hakimiyyət dəyişikliyindən bir neçə gün sonra səsləndirdiyi fikirləri xatırladıb.

Əş-Şaraanın sözlərinə görə, BƏƏ ilə münasibətlərin inkişafı və ərəb ölkələrinin təcrübəsindən yararlanmaq Suriyanın yenidən qurulması prosesində mühüm əhəmiyyət daşıyır.