Qətər və Misir bölgədə gərginliyin azaldılması üçün birgə səyləri müzakirə edib

Qətər və Misirin yüksək vəzifəli rəsmiləri Əl-Ələmeyn şəhərində görüşüblər. Görüş Qətər–Misir Birgə Ali Komitəsinin yeddinci hazırlıq toplantısı çərçivəsində keçirilib. Qətər nümayəndə heyətinə Nayif əl-İmadi rəhbərlik edib. Misir tərəfinə isə İhab Fəhmi başçılıq edib. Tərəflər regional və beynəlxalq məsələlər üzrə davamlı məsləhətləşmələri yüksək qiymətləndiriblər. Bölgədə gərginliyin azaldılması istiqamətində birgə səylərin davam etdirilməsinin vacibliyi vurğulanıb. Doha və Qahirə bölgədə sabitliyin və davamlı sülhün təmin olunmasına tərəfdar olduqlarını bildiriblər. Birgə Ali Komitənin rəsmi iclasının cümə axşamı keçirilməsi nəzərdə tutulur.