BAKI, AzerVoice, Nailə Babazadə
Türkiyə Böyük Millət Məclisinin (TBMM) sədri Numan Kurtulmuş, İsrailin Qəzzanı tamamilə işğal etməyə yönələn planını kəskin şəkildə pisləyib. O, bu planı həm beynəlxalq hüququn, həm də insanlığın ayaqlar altına alınması kimi qiymətləndirib.
AzerVoice xəbər verir ki, Kurtulmuş sosial media hesabında yaydığı açıqlamada bildirib.
"İsrailin sözde ‘Təhlükəsizlik Kabineti’ tərəfindən təsdiqlənən, Qəzzanın tamamilə işğalına yönəlmiş plan — təkcə beynəlxalq hüququ deyil, həm də insanlığı açıq şəkildə ayaqlar altına alan qaranlıq bir addımdır."
Kurtulmuş İsrailin bu addımını soyqırım və müharibə cinayəti adlandıraraq, beynəlxalq ictimaiyyəti bu qanlı plana qarşı susmamağa çağırıb:
"Bu xain planı ən sərt şəkildə lənətləyir və rədd edirik. Beynəlxalq qurumları və ictimaiyyətləri İsrailin bu qanlı işğal planına qarşı çıxmağa və Qəzzanın yanında yer almağa çağırırıq."
Sonda o vurğulayıb ki, bu gün Qəzzanı və Fələstini müdafiə etmək — hüququ, əxlaqı və bəşəriyyətin ortaq gələcəyini müdafiə etmək deməkdir.
Qeyd edək ki, İsrail Təhlükəsizlik Kabineti Qəzza zolağının şimalında yerləşən Qəzza şəhərinin işğalı üçün yeni planı təsdiqləyib. Yerli mənbələr İsrail ordusunun bütün şəhəri ələ keçirmək üçün hazırlıqlara başladığını bildirir.
