BAKI,VOA, Nailə Babazadə

Kipr problemi və ŞKTC-nin xarici siyasəti ilə bağlı bütün addımlar Türkiyə ilə məsləhətləşmələr çərçivəsində atılır və bu proses bundan sonra da davam edəcək.

VOA xəbər verir ki, bu sözləri Şimali Kipr Türk Cümhuriyyətinin Prezidenti Tufan Erhürman bildirib. ŞKTC lideri bu fikirləri "Antalya Diplomatik Forumu (ADF) 2026"-da iştirakı çərçivəsində "Anadolu" agentliyinin müxbirinə verdiyi müsahibədə səsləndirib.

Prezident Erhürman forumun "Sabahı layihələndirərkən qeyri-müəyyənliklərlə mübarizə" mövzusunun çox düzgün seçildiyini və bunun Kipr türklərinin ən çox çətinlik çəkdiyi məsələlərdən biri olduğunu qeyd edib. O, dünyanın böyük bir qeyri-müəyyənlik dövrünə qədəm qoyduğunu və bir çox hadisəni öncədən proqnozlaşdırmağın çətinləşdiyini vurğulayıb.

Türkiyə Prezidenti Rəcəb Tayyib Ərdoğanla keçirdiyi görüşün çox səmərəli olduğunu bildirən Erhürman, Türkiyə rəhbərliyi ilə gündəlik əsasda sıx koordinasiya içində olduqlarını diqqətə çatdırıb: "Hələ seçilməmişdən öncə də bildirmişdim ki, mənim dövrümdə Türkiyə ilə məsləhətləşmələr daha da artacaq. Hörmətli Prezident Ərdoğanla Kipr problemindəki son inkişafları və regional hadisələrin bu məsələyə təsirlərini müzakirə etdik. Tam koordinasiya içində olduğumuzu bir daha qarşılıqlı şəkildə təsdiqlədik".

Kipr probleminin həllinin onlar üçün böyük əhəmiyyət kəsb etdiyini deyən Tufan Erhürman, heç vaxt danışıqlardan qaçan tərəf olmadıqlarını vurğulayıb. Bununla belə, o, mühüm bir xəbərdarlıq da edib: "Tarix bizə öyrətdi ki, danışıqlar masasından kənarda da bir dünya var. Kipr türkləri yalnız danışıqlar masasına həbs olunmaq niyyətində deyil. Biz Türk Dövlətləri Təşkilatı və İslam Əməkdaşlıq Təşkilatında müşahidəçi üzv statusundayıq. Bir çox dost və qardaş ölkə ilə birgə layihələr hazırlamağa və əməkdaşlığımızı genişləndirməyə davam edəcəyik".