BAKI, AzerVoice
Türkiyə Böyük Millət Məclisinin (TBMM) sədri Numan Kurtulmuş Avropa Parlamenti Baş Assambleyasında qəbul edilən 2023–2024-cü illər üzrə Türkiyə Hesabatına sərt reaksiya verib.
AzerVoice xəbər verir ki, TBMM sədri sosial media hesabında yaydığı açıqlamada hesabatın Türkiyəyə qarşı ön mühakimələrə və siyasi şərtlərə əsaslandığını bildirib. O, sənədi ədalətsiz ittihamlarla dolu və konstruktiv dialoqa töhfə verməkdən uzaq bir sənəd adlandırıb.
“Hesabat müəssisələrimiz, xarici siyasətimiz və demokratik fəaliyyətimizə qarşı haqsız ittihamlarla doludur. Bu sənəd Türkiyə-Avropa İttifaqı münasibətlərində ortaq gələcəyə və dialoqa xidmət etmir,” – deyə Kurtulmuş vurğulayıb.
O, Avropa İttifaqı ilə münasibətlərin qarşılıqlı etimada və ortaq maraqlara əsaslanan davamlı yanaşma tələb etdiyini bildirib: “9 May Avropa Günündə biz Avropanın təməl dəyərlərə sadiqliyini gözləyirik. Avropada artan ksenofobiya, islamofobiya və ikili standartlar isə bu dəyərlərə ziddir.”
Sonda Kurtulmuş Avropa Parlamentini məsuliyyətli və realist mövqe sərgiləməyə, Türkiyə ilə AB arasında müsbət dialoq və əməkdaşlıq imkanlarını dəstəkləməyə çağırıb.
