BAKI, AzerVoice, Nərmin Ağayeva
Türkiyənin hakim Ədalət və İnkişaf Partiyasının (AKP) sözçüsü Ömər Çelik, İsrailin işğal altındakı İordan çayının qərb sahilindəki işğalı genişləndirmək planını kəskin tənqid edib.
AzerVoice xəbər verir ki,o, layihəni "soyqırım aktlarının davamı" kimi qiymətləndirib və müstəqil, vahid coğrafiyaya sahib Fələstin dövlətinin qurulması uğrunda mübarizəni davam etdirəcəklərini bildirib
“İsrailin İordan çayının qərb sahili ilə Şərqi Qüdsü ayıracaq yaşayış məntəqələri tikmək planı, onun lənətlənmiş soyqırım aktlarının davamıdır. Bəşəriyyət Fələstin dövlətini tanımaq üçün dəfələrlə qərar qəbul etdiyi bir vaxtda İsrail, yenidən bəşəriyyətə hücum edir və Fələstin dövlətinin ərazi bütövlüyünü hədəfə alır.” - deyə X platformasında paylaşım edən Ömər Çelik deyib.
Xatırladaq ki, İsrailin təsdiq etməyə hazırlaşdığı E1 layihəsi, Şərqi Qüdsü İordan çayının qərb sahilindəki Fələstin ərazilərindən ayırmağı hədəfləyir. Layihə çərçivəsində Maale Adumim qəsəbəsi ilə Şərqi Qüds arasında 3 401 evin inşası planlaşdırılır. Haaretz qəzetinin məlumatına görə, layihə şimalı Qərb Şəriyənin cənubundan ayıracaq və gələn həftə təsdiqlənə bilər.
Qeyd edək ki., İsrailin ifrat sağçı maliyyə naziri Bezalel Smotrich, baş nazir Benyamin Netanyahunun da layihəni dəstəklədiyini bəyan edib. O, Maale Adumimdə çıxışında E1 layihəsinin, Fələstin dövlətini tanıyan Qərb ölkələrinə cavab olduğunu bildirib.
“Bu gün dünyada bir Fələstin dövlətini tanımağa çalışan hər kəs bizdən yerdə cavab alacaq. Fələstinin qurulmasına icazə verməyəcəyik.” - deyə o qeyd edib.
Smotrich, İordan çayının qərb sahilini Bibliya ənənəsinə görə “Yəhuda və Samara” adlandıraraq, Netanyahu ilə bu məsələdə tam fikir birliyində olduqlarını vurğulayıb.
