BAKI, AzerVoice, Nailə Babazadə
Türkiyə Milli Müdafiə Nazirliyi (MSB), Cənubi Kipr Rum İdarəsinin (GKRY) İsraildən hava hücumundan müdafiə sistemi tədarük etməsinə dair yayılan xəbərlərlə bağlı narahatlığını ifadə edib.
AzerVoice xəbər verir ki, Nazirliyin Mətbuat və İctimaiyyətlə Əlaqələr müşaviri və sözçüsü Tuğamiral Zəki Aktürk, nazirlikdə keçirilən həftəlik mətbuat konfransında bu açıqlamanı səsləndirib.
Nazirlik mənbələri bildiriblər ki, Cənubi Kipr tərəfinin davam edən silahlanma cəhdləri və adada sülhü, sabitliyi poza biləcək fəaliyyətləri bölgədə gərginliyi artırmaq riski daşıyır.
"Cənubi Kipr Rum İdarəsinin İsraildən hava hücumundan müdafiə sistemi tədarük etməsi ilə bağlı xəbərləri yaxından izləyirik. Bu silahlanma səyləri və bölgədə sabitliyi poza biləcək fəaliyyətlər təhlükəli nəticələr doğura bilər. Bunu bir daha xatırlatmaq istəyirik." - deyə qeyd edilib.
Nazirlik həmçinin Türkiyənin Şimali Kipr Türk Cümhuriyyətinin (KKTC) təhlükəsizliyi və sabitliyi üçün bütün zəruri addımları atdığını vurğulayıb.
"Adadakı mövcud tarazlığı poza biləcək hər cür təşəbbüs diqqətlə izlənir. KKTC-nin təhlükəsizliyi və rifahı üçün bütün lazımi tədbirlər görülür. Türkiyə keçmişdə olduğu kimi, bu gün də KKTC-nin yanında və dəstəkçisidir. Kipr Türk xalqı Türkiyənin təminatı altındadır."
Bu açıqlama, bölgədə artan gərginlik fonunda Türkiyənin Kipr məsələsində sərt mövqeyini bir daha ortaya qoymuş oldu.
