BAKI, AzerVoice, Nailə Babazadə
Türkiyənin xarici işlər naziri Hakan Fidan sabah Almaniya xarici işlər naziri Yohann Vadepulun dəvəti ilə Berlini ziyarət edəcək. Bu, Fidanın Almaniyaya ilk ikitərəfli səfəri olacaq.
AzerVoice xəbər verir ki, Fidanın səfər çərçivəsində Almaniyadakı türk icması və iş adamlarıyla görüşməsi, həmçinin Almaniya tərəfi ilə siyasi, iqtisadi və müdafiə əməkdaşlığını müzakirə etməsi planlaşdırılır. Türkiyə–Aİ münasibətləri, Gömrük Birliyinin yenilənməsi, viza sərbəstisi və enerji–nəqliyyat sahələrində əməkdaşlıq gündəmin əsas mövzuları olacaq.
Nazirin danışıqlarda Türkiyənin NATO çərçivəsində Avropa təhlükəsizliyinə töhfələrini vurğulaması və müdafiə sənayesində, o cümlədən Eurofighter Typhoon qırıcılarının tədarükü üzrə əməkdaşlığı önə çıxarması gözlənilir.
Fidan həmçinin Qəzzada atəşkəsin təmin edilməsi, humanitar yardımların fasiləsiz çatdırılması və yenidənqurma prosesinin başlanmasının vacibliyini Almaniya tərəfinə çatdıracaq. Suriya ilə bağlı regional sabitlik və terrorla mübarizə məsələləri də müzakirə olunacaq.
