BAKI, VOA, Orxan Qədirzadə
Türkiyə martın 30-da qeyd olunan Beynəlxalq Sıfır Tullantı Günü çərçivəsində qlobal ekoloji hərəkatın mərkəzi qərargahı kimi çıxış edib.
VOA xəbər verir ki, ölkənin birinci xanımı Əminə Ərdoğanın rəhbərliyi ilə təxminən on il əvvəl başladılan bu təşəbbüs yerli təkrar emal layihəsindən beynəlxalq proqrama çevrilərək geniş vüsət alıb.
Layihənin icrasına başlanılan 2017-ci ildən bu yana Türkiyə 90 milyon ton tullantını təkrar emal edərək iqtisadi dövriyyəyə qaytarıb ki, bu da ölkə iqtisadiyyatına 365 milyard türk lirəsi məbləğində xeyir verib. Statisitik məlumatlara görə, tullantıların təkrar emalı səviyyəsi 2017-ci ildəki 13 faizdən 2025-ci ildə 37,53 faizə yüksəlib. Rəsmi Ankara bu göstəricini 2035-ci ilə qədər 60 faizə, 2053-cü ilə qədər isə 70 faizə çatdırmağı hədəfləyir.
Proqram çərçivəsində əldə olunan nəticələr yalnız iqtisadi səmərə ilə məhdudlaşmır. Belə ki, görülən tədbirlər sayəsində 180 milyon ton istixana qazının atmosferə atılmasının qarşısı alınıb, 54 milyon ev təsərrüfatının illik ehtiyacına bərabər elektrik enerjisinə qənaət edilib. Bundan əlavə, qənaət olunan suyun həcmi İstanbulun iki illik su istehlakı ilə müqayisə olunur.
Xatırladaq ki, 2022-ci ilin dekabrında BMT Baş Assambleyası Türkiyənin təklif etdiyi qətnaməni qəbul edərək 30 mart tarixini Beynəlxalq Sıfır Tullantı Günü elan edib. Hazırda bu qlobal bəyannaməyə 131 ölkədən 438 mindən çox könüllü, həmçinin 50-dən çox birinci xanım və beynəlxalq təşkilat nümayəndəsi qoşulub.
