BAKI,VOA, Nailə Babazadə

Türkiyə Xarici İşlər Nazirliyi Malinin müxtəlif bölgələrində törədilmiş qanlı terror aktlarını qətiyyətlə pisləyən rəsmi bəyanat yayıb.

VOA xəbər verir ki, nazirliyin yazılı açıqlamasında bu hücumlar "mənfur aktlar" kimi xarakterizə edilib və Türkiyənin hadisə ilə bağlı dərin kədər hissi keçirdiyi vurğulanıb.

Bəyanatda deyilir: "Malinin müxtəlif bölgələrində bu gün meydana gələn terror hücumlarını güclü şəkildə qınayırıq. Bu mənfur hücumlarda həyatını itirənlərə Allahdan rəhmət diləyir, yaxınlarına və qardaş Mali xalqına dərin hüznlə başsağlığı veririk."

Türkiyə tərəfi həmçinin bəyan edib ki, rəsmi Ankara terrorla mübarizə sahəsində Mali ilə tam həmrəylik içindədir. Açıqlamanın sonunda Türkiyənin Sahel bölgəsində qalıcı sülh və sabitliyin bərqərar olması istiqamətindəki səyləri dəstəkləməyə, habelə dost ölkə Malinin təhlükəsizlik cəhdlərinə yardım etməyə davam edəcəyi xüsusi qeyd olunub.