BAKI,VOA Orxan Qədirzadə
Türkiyə Prezidenti Rəcəb Tayyib Ərdoğan bildirib ki, Türkiyə görkəmli maarifçi İsmayıl Qaspıralının "Dildə, fikirdə, işdə birlik" şüarından ilhamlanaraq türk əməkdaşlığı təşkilatları çərçivəsində fəaliyyətini gündən-günə daha da dərinləşdirir və genişləndirir.
Bu barədə Prezident Ərdoğanın Bakıda Birinci Türkologiya Qurultayının 100 illiyi münasibətilə keçirilən Türk Dünyası Həftəsinin açılış mərasiminin iştirakçılarına ünvanladığı müraciətdə bildirilib. Prezidentin müraciətini Türkiyənin mədəniyyət və turizm nazirinin müavini Gökhan Yazğı səsləndirib.
Rəcəb Tayyib Ərdoğan müraciətində tədbirin uğurla keçəcəyinə və bütün türk dünyası üçün faydalı nəticələr verəcəyinə ümid etdiyini ifadə edib.
O qeyd edib ki, yüz il əvvəl türk dünyasının müxtəlif bölgələrindən olan ziyalılar Bakıda bir araya gələrək müsbət elmlər əsasında ortaq tarixi və sivilizasiya şüurunun möhkəmləndirilməsi istiqamətində mühüm addım atıblar.
Prezident vurğulayıb ki, Birinci Türkologiya Qurultayının iştirakçıları apardıqları müzakirələr və qəbul etdikləri qərarlarla uzaqgörənlik və strateji baxış nümayiş etdirərək bu gün də aktuallığını qoruyan elmi araşdırmaların əsasını qoyublar.
Ərdoğan bildirib ki, Bakı Qurultayının türk dünyasına miras qoyduğu bu ideyanın qorunması, gücləndirilməsi və gələcək nəsillərə ötürülməsi ortaq mənəvi məkanın bütün guşələrində yaşayan hər kəsin ümumi məsuliyyətidir.
Onun sözlərinə görə, məhz bu səbəbdən Türkiyə İsmayıl Qaspıralının "Dildə, fikirdə, işdə birlik" şüarını rəhbər tutaraq türk əməkdaşlığı təşkilatları çərçivəsində fəaliyyətini hər keçən gün daha da genişləndirir və dərinləşdirir.
Türkiyə Prezidenti vurğulayıb ki, ölkəsi bu gün də Bakı Qurultayında formalaşmış baxışı öz yolunu işıqlandıran mayak kimi qəbul edir.
Ərdoğan qeyd edib ki, Türkiyənin ən səmimi arzusu türk dünyasının ortaq tarixini, dilini və mədəniyyətini qoruyub saxlaması, qədim irsinin gücünə söykənərək "Türk Əsri"ni birlikdə qurmasıdır.
Prezident bildirib ki, Türkiyə qarşıdan gələn payızda Ankarada keçiriləcək Türk Dövlətləri Təşkilatının Zirvə Görüşünün türk dünyasının inteqrasiyasının daha da möhkəmləndirilməsi baxımından mühüm mərhələyə çevrilməsi üçün bütün səylərini göstərir. Həmin zirvə çərçivəsində Türkiyə təşkilata sədrliyi Azərbaycandan təhvil alacaq.
Ərdoğan Birinci Türkologiya Qurultayı kimi bu tədbirin də məhz Bakıda keçirilməsinin təsadüfi olmadığını vurğulayıb.
Onun sözlərinə görə, türk dünyasında birlik və həmrəyliyin ən ardıcıl tərəfdarlarından biri olan Azərbaycan bu gün də türk dövlətlərinin ortaq məqsədlərinə nail olunmasına mühüm töhfələr verməyə davam edir.
Türkiyə Prezidenti çıxışının sonunda tədbirin təşkilində iştirak edən qardaş Azərbaycanın bütün dövlət qurumlarına və təşkilatlarına təşəkkürünü bildirib, Birinci Türkologiya Qurultayının iştirakçılarının xatirəsini ehtiramla yad edib, türk dünyasının birliyinin, həmrəyliyinin və qardaşlığının daim möhkəm qalmasını arzulayıb.
