BAKI,VOA Orxan Qədirzadə
Türkiyədə 16 vilayətdə fəaliyyət göstərən 22 ayrı mütəşəkkil cinayət qrupuna qarşı genişmiqyaslı əməliyyat keçirilib. Əməliyyat nəticəsində 228 şübhəli saxlanılıb, onların bank hesablarında ümumilikdə 10 milyard 166 milyon türk lirəsi məbləğində maliyyə dövriyyəsinin olduğu müəyyən edilib.
Türkiyənin Daxili İşlər Nazirliyinin məlumatına görə, əməliyyat Jandarma Baş Komandanlığının Qaçaqmalçılıq və Mütəşəkkil Cinayətkarlıqla Mübarizə, Kibercinayətkarlıqla Mübarizə qurumları, Maliyyə Cinayətlərinin Araşdırılması Şurası (MASAK) və prokurorluq orqanlarının koordinasiyası ilə həyata keçirilib.
Əməliyyatlar Ankara, Antalya, Afyonkarahisar, Aydın, Diyarbəkir, Ədirnə, Qaziantep, İğdır, Kilis, Kırklareli, Kocaeli, Malatya, Manisa, Ordu, Şırnak və Tekirdağ vilayətlərini əhatə edib.
İstintaq zamanı müəyyən olunub ki, cinayət qruplarının üzvləri sosial şəbəkələrdə saxta investisiya məsləhətçiliyi elanları yerləşdirərək vətəndaşları aldadıblar. Bundan başqa, onların narkotik vasitələrin qanunsuz dövriyyəsini təşkil etdikləri, internet üzərindən qanunsuz mərc oyunları keçirdikləri, maliyyə köçürmələrinə vasitəçilik etdikləri, hədə-qorxu, fiziki zorakılıq və təhdid yolu ilə sahibkarlardan qanunsuz gəlir əldə etməyə çalışdıqları müəyyənləşdirilib.
Şübhəlilərin dövlət qurumlarına məxsus vəsaitlərin mənimsənilməsi, eləcə də sələmçilik fəaliyyəti ilə məşğul olduqları da istintaq materiallarında yer alıb.
Maliyyə Cinayətlərinin Araşdırılması Şurasının apardığı araşdırmalar nəticəsində saxlanılan şəxslərin hesablarında ümumilikdə 10 milyard 166 milyon türk lirəsi həcmində maliyyə əməliyyatının həyata keçirildiyi aşkarlanıb.
Əməliyyat çərçivəsində təxminən 818 milyon türk lirəsi dəyərində əmlaka məhdudiyyət qoyulub. Bu çərçivədə altı şirkət, 28 daşınmaz əmlak, 40 daşınar əmlak və 891 bank hesabı üzrə təminat tədbirləri tətbiq edilib.
Hüquq-mühafizə orqanları tərəfindən keçirilən axtarışlar zamanı çoxsaylı rəqəmsal daşıyıcılar, müxtəlif məbləğlərdə nağd pul, sənədlər və narkotik vasitələr də götürülüb.
Türkiyənin Daxili İşlər Nazirliyi bildirib ki, ölkənin təhlükəsizliyini pozan mütəşəkkil cinayət qruplarına qarşı mübarizə fasiləsiz davam etdirilir və heç bir cinayətkarın cəzasız qalmasına yol verilməyəcək.
