BAKI,VOA Orxan Qədirzadə
2026-cı ilin yanvar–iyun aylarında Türkiyədə Pakistan kapitallı 89 yeni şirkət qeydiyyata alınıb. Bu, ötən ilin eyni dövrü ilə müqayisədə 37 şirkət çoxdur.
Bu barədə VOA-ya Türkiyə Ticarət və Sənaye Palatasından (TOBB) məlumat verilib.
Qurumdan bildirilib ki, hesabat dövründə Türkiyədə qeydiyyata alınan Pakistan kapitallı şirkətlərin ümumi kapitalı 121 milyon 875 min 25 türk lirəsi təşkil edib. 2025-ci ilin eyni dövründə bu göstərici 49 milyon 450 min türk lirəsi olub.
TOBB-un məlumatına görə, 2026-cı ilin ilk altı ayında qeydiyyata alınan Pakistan kapitallı şirkətlərin böyük hissəsi – 80 şirkət İstanbulda fəaliyyətə başlayıb.
"İstanbulda qeydiyyata alınan Pakistan şirkətlərinin ümumi kapitalı 66 milyon 975 min 25 türk lirəsi təşkil edib", – deyə qurumdan bildirilib.
Məlumata əsasən, bu ilin yanvar–iyun aylarında Türkiyədə yaradılan Pakistan kapitallı şirkətlərin 33-ü ticarət sektorunda qeydiyyata alınıb. Digər şirkətlər isə sənaye, logistika, xidmət, istehsal, informasiya texnologiyaları və iqtisadiyyatın müxtəlif sahələrində fəaliyyət göstərir.
