BAKI, AzerVoice
ABŞ-ın ən tanınmış mafiya liderlərindən biri, “zərif geyimi” və bahalı kostyumları ilə məşhur olan “Dapper Don” (Zərif Don) ləqəbli Con Cozef Qotti (John Joseph Gotti Jr.) Nyu-Yorkun Bruks rayonunda dünyaya gəlib.
İtaliyalı immiqrant nəslindən gələn Qotti 13 uşaqlı kasıb ailədə böyüyüb. Gənclik illərində Bruklində mafiozlar üçün xırda işlər görür, sonra Fulton-Rockaway Boys adlı küçə dəstəsinə qoşulur və 16 yaşında məktəbi tərk edir.Erkən yaşlarından oğurluq və digər xırda cinayətlərə görə dəfələrlə həbs olunsa da, ciddi cəza almır. 1968-ci ildə isə Nyu-Yorkun Kennedi (o vaxt “Idlewild”) aeroportu yaxınlığında yük maşınlarının qaçırılmasına görə günahını etiraf edir və 3 il həbs cəzası alır.
Gambino ailəsinə yüksəliş
1974-cü ildə Qotti, mafiyanın rəhbəri Karlo Gambinonun qardaşı oğlunun qaçırılıb öldürülməsinə cavab olaraq törədilən qətldə iştirak etdiyi üçün yenidən həbs olunur. Rüşvət müqabilində həbsxanadan tez-tez çıxmağa icazə alır və 1977-ci ildə azadlığa çıxandan sonra Gambino ailəsinin “Bergin” qrupunda kapitan rütbəsinə yüksəlir.Bu, ABŞ-ın ən güclü və nüfuzlu cinayət ailələrindən biri idi.
1985-ci ilin dekabrında Qotti, Manhettendə bir restoran qarşısında ailənin o zamankı rəhbəri Pol Kastellanonu öldürtdürərək Gambino ailəsinin yeni başçısına çevrilir.
“Teflon Don”
ABŞ federal hökuməti Qottini illərlə izləyir və telefon danışıqlarını dinləyərək ona qarşı dəlillər toplayır. 1986-cı ildə ona qarşı reketlik ittihamı irəli sürülür, lakin Qotti məhkəmədən bəraət alır.
Mətbuat bu hadisədən sonra onu “Teflon Don” - yəni “üzərinə heç nə yapışmayan Don” adlandırır, çünki o, dəfələrlə həbs olunmasına baxmayaraq cəza almırdı.
Sonradan məlum olur ki, məhkəmə münsifi rüşvət müqabilində Qottinin bəraətinə səs verib.
Qotti öz üslubu, bahalı geyimləri və mətbuatla davranışı sayəsində ABŞ mətbuatının sevimli fiquruna çevrilmişdi. O, milyonlarla dollar qazansa da, özünü “santexnika avadanlıqları satıcısı” kimi təqdim edirdi.
Lakin gizli dinləmələr göstərdi ki, onun arxasında amansız, qəddar bir mafioz durur və o, ən kiçik hörmətsizliyə belə dözmürdü.
1990-cı ilin dekabrında Qotti və yaxın çevrəsi Nyu-Yorkun “Little Italy” (Kiçik İtaliya) məhəlləsindəki Ravenite Sosial Klubunda həbs olunurlar. Mafiya üzvü Salvatore “Sammy the Bull” Gravano hökumətlə əməkdaşlığa gedir və Qottiyə qarşı ifadə verir.
1992-ci ilin aprelində məhkəmə Qottini 13 maddə üzrə - qətl və reketlik daxil olmaqla - günahkar elan edir. O, İllinoys ştatındakı Marion federal həbsxanasına göndərilir və gündə 23 saat kamerasında saxlanılır.
Con Qotti 10 iyun 2002-ci ildə, 61 yaşında, boğaz xərçəngindən ABŞ-ın Missuri ştatındakı Springfield Federal Tibb Mərkəzində vəfat edib.
