Formula 1 yarışları uzun fasilədən sonra yenidən Türkiyəyə qayıdır və İstanbul Park yenidən qlobal idman xəritəsində ön plana çıxır.
ArabAZ xəbər verir ki, Türkiyə Qran-prisi 2027-ci ildən etibarən ən azı 5 il müddətinə Formula 1 təqviminə daxil ediləcək.
Yarışların İstanbul Park trasında keçirilməsi planlaşdırılır. Bu tras daha əvvəl 2005–2011-ci illərdə, eləcə də 2020 və 2021-ci illərdə Formula 1 mərhələlərinə ev sahibliyi edib.
İstanbulda keçirilən təqdimat mərasimində bildirilib ki, layihə Türkiyə hökumətinin dəstəyi ilə həyata keçirilir və beynəlxalq miqyasda böyük idman və turizm potensialı daşıyır.
Tədbir çərçivəsində Formula 1 bolidi İstanbul küçələrində nümayiş etdirilib və bu görüntülər qlobal mediada geniş yayılıb.
Rəsmi çıxışlarda vurğulanıb ki, yarışların geri dönüşü Türkiyənin idman sahəsində mövqeyini gücləndirməklə yanaşı, İstanbulun beynəlxalq turizm və mədəniyyət mərkəzi kimi rolunu da möhkəmləndirəcək.
5,338 kilometrlik uzunluğu ilə seçilən İstanbul Park trası xüsusilə məşhur 8-ci döngəsi ilə pilotlar arasında çətin və eyni zamanda maraqlı trek kimi tanınır.
Ekspertlərin fikrincə, yarışların bərpası İstanbulun həm iqtisadi, həm də turizm baxımından əlavə dəyər qazanmasına səbəb olacaq.
