Fələstinin “HƏMAS” hərəkatı Qəzza zolağında faktiki hökumət rolunu oynayan “Hökumət Fövqəladə Hallar Komitəsi”nin fəaliyyətinə rəsmi şəkildə son qoyub. Hərəkat eyni zamanda komitə rəhbərinin istefa verdiyini elan edib. Bu addım Qəzzanın idarəçiliyini müstəqil texnokratlardan ibarət “Qəzza İdarəçiliyi üzrə Milli Komitə”yə təhvil vermək məqsədilə atılıb.
ArabAZ xəbər verir ki, Qəzzadakı Hökumət Media Ofisinin bəyanatına görə, strukturun təhvil-təslim prosesi üçün bütün inzibati və hüquqi hazırlıqlar tamamlanıb. Bu plan Fələstin qruplaşmalarını təmsil edən komandaya, tayfa liderlərinə, mülki cəmiyyət institutlarına və BMT-nin müşahidəçi nümayəndəsinə şəffaf şəkildə təqdim olunub.
Hökumət Fövqəladə Hallar Komitəsinin rəhbəri Məhəmməd Əbdülxaliq əl-Fərra keçid prosesini asanlaşdırmaq üçün rəsmi istefasını təqdim edib. Media Ofisi bəyan edib ki, hazırda Qəzzada yalnız texniki və peşəkar səviyyəli mühəndis-mütəxəssislər iş başında qalıblar. Bu kadrlar xidmətlərin dayanmaması və idarəçilikdə boşluq yaranmaması üçün fəaliyyətlərini davam etdirirlər. Bu addım Fələstin fraksiyalarının Qahirədə razılaşdırdığı “yol xəritəsi”nə tam uyğundur.
Bu qərar “HƏMAS”ın 2007-ci ildə “Fəth” hərəkatı ilə yaşanan qarşıdurmalardan sonra Qəzzada qurduğu 20 illik təkbaşlı idarəçiliyin rəsmən başa çatması deməkdir. İsrailin 2025-ci ilin martında hökumət komitəsinin sədri İsam əd-Dəalisə qarşı təşkil etdiyi sui-qəsddən sonra bu vəzifəni Məhəmməd əl-Fərra icra edirdi. Qəzzadakı bütün dövlət işçiləri yeni qurulacaq Milli Komitənin rəhbərliyi altında işləməyə tam hazır olduqlarını bəyan ediblər. Hərəkat rəsmiləri bu addımla İsrailin blokadanı davam etdirmək bəhanələrini tamamilə əlindən aldıqlarını və növbəti mərhələnin beynəlxalq vasitəçilərin öhdəsində olduğunu vurğulayıblar.
