İraq milli komandası 2026-cı il Dünya Çempionatının finallarına hazırlıq mərhələsinə start verir. “Mesopotamiya aslanları” bu ayın sonunda İspaniyada keçiriləcək təlim-məşq toplanışı çərçivəsində Andorra yığması ilə yoldaşlıq görüşündə üz-üzə gələcək.
ArabAZ xəbər verir ki, İraq Futbol Federasiyasının rəsmi saytının yaydığı məlumata görə, federasiya rəhbəri Adnan Dirjal və onun andorralı həmkarı Feliks Alvares yoldaşlıq oyununun keçirilməsi ilə bağlı bütün detalları razılaşdırıblar. Bu razılıq Kanadanın Vankuver şəhərində keçirilən FİFA-nın 76-cı Konqresi çərçivəsində baş tutan görüş zamanı əldə olunub.
İraq və Andorra yığmaları arasındakı qarşılaşma mayın 29-da baş tutacaq. Bu oyun İraq millisinin mayın 18-də start götürəcək və iyunun 5-nə qədər davam edəcək İspaniya toplanışının bir hissəsidir.
Andorra ilə oyun İraqın dünya çempionatına hazırlıq proqramının ilk mərhələsi hesab olunur. Bu oyundan sonra, iyunun 4-də İraq millisini daha bir ciddi sınaq — İspaniya yığması ilə yoldaşlıq görüşü gözləyir.
Xatırladaq ki, “Mesopotamiya aslanları” 2026-cı il Dünya Çempionatında “I” qrupunda yer alıblar. İraq millisi bu qrupda Fransa, Seneqal və Norveç yığmalarına qarşı mübarizə aparacaq.
