Tobrukdakı Qırmızı Aypara Cəmiyyəti dünən (çərşənbə günü) bildirib ki, Liviya Milli Ordusuna tabe olan və Liviyanın şərqində yerləşən sahil mühafizə dəstələri, dənizdə ağır şəraitlə üzləşən 10 qayıqdakı ən azı 404 miqrantı xilas edib.
ArabAZ xəbər verir ki, Tobruk Liviyanın şərqində, Misir sərhədi yaxınlığında yerləşən sahil şəhəridir. Şəhərdəki Qırmızı Aypara Cəmiyyəti miqrantların müxtəlif millətlərdən olduğunu qeyd edib.
Qırmızı Ayparanın “Facebook“da paylaşdığı fotolarda könüllülərin miqrantlara ilkin tibbi yardım göstərdiyi, onlara qida və adyallar payladığı görünür.
Liviya münaqişələrdən və yoxsulluqdan xilas olmaq ümidi ilə Avropaya qaçmaq üçün səhra və dəniz vasitəsilə təhlükəli səfərə çıxan, bir çoxu Saharaaltı Afrikadan olan miqrantlar üçün tranzit marşrutu hesab olunur.
Üç Liviya mənbəsi və Beynəlxalq Miqrasiya Təşkilatının (BMT) məlumatına görə, bazar ertəsi günü Tobruk sahillərində qayıqlarının aşması nəticəsində 10 miqrantın ölümü təsdiqlənib, 31 nəfər isə hələ də itkin düşmüş hesab olunur. Şənbə günü isə dalğaların sahilə çıxardığı altı cəsəd tapılıb.
