Qətər Dövlətinin Əmiri Şeyx Təmim bin Həməd Əl Tani ilə Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Əl Nəhyan arasında telefon danışığı baş tutub.
ArabAZ xəbər verir ki, telefon danışığı zamanı iki ölkə arasındakı qardaşlıq münasibətləri və müxtəlif sahələrdə ikitərəfli əməkdaşlığın inkişaf etdirilməsi yolları müzakirə olunub. Liderlər hər iki qardaş xalqın ümumi maraqlarına xidmət edən strateji tərəfdaşlığın daha da möhkəmləndirilməsinin vacibliyini vurğulayıblar.
Əmir Şeyx Təmim və Şeyx Məhəmməd bin Zayed həmçinin qarşılıqlı maraq doğuran bir sıra aktual regional və beynəlxalq məsələlər ətrafında fikir mübadiləsi aparıblar. Söhbət zamanı regionda təhlükəsizliyin və sabitliyin təmin olunması istiqamətində birgə səylərin əhəmiyyəti qeyd edilib.
Liderlər Körfəz Əməkdaşlıq Şurası (KƏŞ) çərçivəsində koordinasiyanın davam etdirilməsinin və regionda sülhün qorunması üçün dialoqun genişləndirilməsinin zəruriliyini bildiriblər.
