Səudiyyə Ərəbistanı Maliyyə Nazirliyinin rüblük büdcə icrası hesabatına əsasən, 2026-cı ilin birinci rübündə neft gəlirlərinin azalması və dövlət xərclərinin kəskin artması nəticəsində ölkə büdcəsində 125,7 milyard Səudiyyə rialı (SR) məbləğində kəsir yaranıb. Sözügedən dövrdə ümumi gəlirlər 260,97 milyard rial təşkil edib ki, bunun da ən böyük hissəsi neft gəlirlərinin payına düşüb.
ArabAZ xəbər verir ki, neft gəlirləri illik müqayisədə 3 faiz azalaraq 144,72 milyard riala düşsə də, hələ də ümumi daxilolmaların əsas sütununu təşkil edir. Eyni zamanda, qeyri-neft gəlirləri 2 faiz artaraq 116,25 milyard riala yüksəlib ki, burada əsas hərəkətverici qüvvə 74,93 milyard rial gəlir gətirən mal və xidmətlər üzrə vergilər olub.
Hesabat dövründə dövlət xərcləri ötən ilin eyni dövrü ilə müqayisədə 20 faiz artaraq 386,69 milyard riala çatıb ki, bu da dövlət əməliyyatları və mühüm infrastruktur layihələrinə ayrılan vəsaitlərin çoxalmasını əks etdirir. İşçilərin kompensasiyası (əməkhaqqı və s.) üçün 151,06 milyard rial xərcləndiyi halda, mal və xidmətlərə yönəldilən vəsaitlər 98,05 milyard riala qədər yüksəlib. İnfrastruktur və inkişaf layihələrinə davamlı investisiyaların göstəricisi olan əsaslı xərclər (qeyri-maliyyə aktivləri) isə 43,43 milyard rial təşkil edib.
Yaranmış büdcə kəsiri tamamilə borclanma hesabına maliyyələşdirilib və nəticədə dövlət borcu ilin əvvəlindəki 1,52 trilyon rialdan birinci rübün sonunda 1,67 trilyon riala yüksəlib. Bu borcun 1,04 trilyon rialı daxili, 624,4 milyard rialı isə xarici borcun payına düşür ki, bu da Krallığın həm yerli, həm də beynəlxalq borc bazarlarından asılılığının davam etdiyini göstərir. Cari dövrün sonunda hökumət ehtiyatları 400,93 milyard rial, cari hesab balansının qalığı isə 67,67 milyard rial səviyyəsində qərarlaşıb. Sektorlar üzrə xərcləmə məlumatları isə hərbi, təhlükəsizlik, təhsil, səhiyyə və sosial inkişaf sahələrinə ayrılan vəsaitlərin artdığını nümayiş etdirir.
