Səudiyyə Ərəbistanı iki ölkə arasındakı tarixi və xüsusi münasibətlərin dərinliyini nümayiş etdirən, həmçinin Krallığı ziyarət etmək istəyənlər üçün təqdim olunan güzəştləri genişləndirən mühüm bir addım ataraq Böyük Britaniya vətəndaşları üçün elektron səyahət icazəsi (ETA) xidmətini istifadəyə verib.
ArabAZ xəbər verir ki, buiki tərəf arasında qarşılıqlı prinsip və asanlaşdırma tədbirləri çərçivəsində reallaşıb. Yeni xidmət Böyük Britaniya vətəndaşlarına Səudiyyə Ərəbistanına çoxdəfəlik elektron səyahət icazəsi ilə daxil olmaq imkanı yaradır. Vətəndaşlar bir il ərzində ardıcıl və ya fasilələrlə 180 günə qədər ölkədə qala biləcəklər.
Səudiyyə Ərəbistanı Xarici İşlər Nazirliyinin yaydığı bəyanatda qeyd olunub ki, elektron icazə Krallığa turizm, qısamüddətli təhsil və biznes kimi müxtəlif məqsədlərlə səfər etmək imkanı tanıyır. Bununla belə, bura qüvvədə olan qaydalara əsasən xüsusi vizaların alınmasını tələb edən iş, yaşayış və ya həcc vizaları daxil deyil.
Xidmətin 1 iyul 2026-cı il, çərşənbə günündən etibarən qüvvəyə minməsi planlaşdırılır. Yeni qayda bütün növ Britaniya pasportlarına şamil ediləcək ki, bu da iki ölkə arasında gediş-gəliş hərəkətliliyini artırmağa, Səudiyyə Ərəbistanı ilə Böyük Britaniya arasında tərəfdaşlıq və əməkdaşlıq üçün daha geniş üfüqlər açmağa kömək edəcək.
