Qətər Fondunun (QF) sədri Şeyxa Moza bint Nasser Qətər Universitetinin (QU) Səhiyyə Sektoru üzrə 49-cu buraxılışının (2026-cı il məzunları) təntənəli məzuniyyət mərasimində iştirak edib.
ArabAZ xəbər verir ki, umumilikdə 349 məzunun qatıldığı bu qrupda Səhiyyə Elmləri Kollecinin 130, Əczaçılıq Kollecinin 94, Tibb Bacısı Kollecinin 36, Tibb Kollecinin 66 və Stomatologiya Kollecinin 23 məzunu yer alıb. Bu ilki mərasim həm də Tibb Bacısı Kollecinin ilk məzunlarını verməsi ilə əlamətdar olub ki, bu da universitetin “Qətər Milli Vizyonu 2030” hədəflərinə uyğun olaraq ölkənin səhiyyə sistemini gücləndirmək üçün akademik proqramlarını genişləndirməsinin bariz nümunəsidir.
Mərasimdə ilk dəfə olaraq tətbiq edilən “Səhiyyə Andı” məzunların peşəkar fəaliyyətə keçidini və onların xidmət, məsuliyyət, mərhəmət və dürüstlük kimi ali dəyərlərə sadiqliyini simvolizə edib. Bu and içmə mərasimi gənc mütəxəssislərin təkcə akademik yollarını tamamlamasını deyil, həm də xəstə baxımında etik standartlara bağlılıqlarını ifadə edib.
Tədbirin fəxri qonağı, Tibb Bacısı Kollecinin təsisçi dekanı Dr. Nabilə Əl-Meer çıxışında bu anın onlarca illik xəyalların reallaşması olduğunu bildirib və qeyd edib ki, kollecin yaradılması akademik sahə ilə cəmiyyətin ehtiyacları arasında körpü qurmaq yolunda atılan strateji bir addımdır. O, yeni nəsil tibb bacılarının inteqrasiya olunmuş müasir səhiyyə çağırışlarına cavab verməyə tam hazır olduqlarını vurğulayıb.
Məzunlar adından çıxış edən Tibb Kollecinin məzunu Məhəmməd Əl-Hor və mərasimin aparıcısı, Səhiyyə Elmləri Kollecinin məzunu Cövhərə Saleh Əl-Cərmuzi bildiriblər ki, fərqli ixtisaslara sahib olsalar da, hamısının məqsədi birdir – Qətər millətinin rifahı və sağlamlığı üçün vahid sistemin bir parçası kimi çalışmaq.
Mərasimdən sonra Şeyxa Moza yüksək nailiyyətlər göstərən bir qrup məzunla görüşərək onların akademik səfərləri və gələcək arzuları barədə səmimi söhbət edib. Bu məzuniyyət günü Qətərin milli kadr potensialının gücləndirilməsi və səhiyyə sahəsində davamlı inkişafın təmin edilməsi istiqamətində növbəti böyük uğur kimi yadda qalıb.
